کانگو ۔ افریقی ملک کانگو میں تانبے کی کان منہدم ہونے سے 30 سے ​​زائد افراد ہلاک ہو گئے۔

غیر ملکی خبر رساں ادارے کے مطابق کانگو میں ہفتے کے روز تانبے کی کان میں پل گرنے سے کم از کم 32 کان کن ہلاک ہو گئے۔

حادثہ کانگو کے صوبے لوالابا میں پیش آیا۔

لوالابا صوبے کے وزیر داخلہ کا کہنا تھا کہ اب تک 32 لاشیں نکالی جا چکی ہیں جب کہ مزید افراد کی تلاش جاری ہے۔

وزیر داخلہ نے کہا کہ موسلادھار بارش اور لینڈ سلائیڈنگ کے خطرے کی وجہ سے جائے وقوعہ تک رسائی پر پابندی تھی تاہم غیر قانونی کان کنوں نے زبردستی کان میں جانے کی کوشش کی۔

انہوں نے کہا کہ زیر آب حصے پر ایک عارضی پل بنایا گیا تھا، جو اس وقت گر گیا جب بڑی تعداد میں کان کن وہاں سے گزرے۔

خبر رساں ادارے کے مطابق کانگو میں تقریباً دو لاکھ افراد غیر قانونی کانوں میں کام کرتے ہیں جو کہ خطرناک حالات کی وجہ سے بدنام ہیں۔