ایران اور امریکا کے درمیان بڑھتی ہوئی کشیدگی کے دوران ایک غیر معمولی واقعہ سامنے آیا ہے جس نے دفاعی ماہرین اور عوامی حلقوں میں نئی بحث چھیڑ دی ہے۔ بین الاقوامی میڈیا رپورٹس کے مطابق ایک ویڈیو میں ایرانی شہریوں کو امریکی فوجی ہیلی کاپٹروں پر فائرنگ کرتے دیکھا گیا ہے۔
امریکی نشریاتی ادارےاین بی سی نیوز نے اس ویڈیو کی تصدیق کرتے ہوئے بتایا کہ یہ واقعہ ایران کے جنوب مغربی علاقے میں پیش آیا، جہاں امریکی ہیلی کاپٹر ایک گرنے والے جنگی طیارے کے پائلٹس کی تلاش میں مصروف تھے۔
سوشل میڈیا پر گردش کرنے والی فوٹیج میں دیکھا جا سکتا ہے کہ عام لباس میں ملبوس چند افراد ایک گاڑی سے اتر کر کھلے میدان میں پوزیشن لیتے ہیں اور نچلی پرواز کرنے والے ہیلی کاپٹروں کی جانب خودکار ہتھیاروں سے فائرنگ شروع کر دیتے ہیں۔ ویڈیو بنانے والا شخص اس دوران بلند آواز میں حملے کی ترغیب دیتا بھی سنائی دیتا ہے۔
مناظر میں یہ بھی دکھایا گیا ہے کہ جیسے ہی ایک ہیلی کاپٹر علاقے سے گزرتا ہے، حملہ آور فوراً دوسرے کی جانب رخ کر کے فائرنگ جاری رکھتے ہیں۔ اسی نوعیت کی مزید ویڈیوز بھی سامنے آئی ہیں، جن میں مختلف مقامات پر اسی طرح کے واقعات دیکھے جا سکتے ہیں۔
دفاعی ماہرین کے مطابق یہ صورتحال غیر معمولی ہے، کیونکہ جدید فوجی ہیلی کاپٹروں کو عموماً جدید فضائی دفاعی نظام کے ذریعے نشانہ بنایا جاتا ہے، جبکہ یہاں عام شہریوں کی جانب سے محدود وسائل کے باوجود براہِ راست مقابلے کی کوشش کی گئی۔
تجزیہ کاروں کا کہنا ہے کہ ایسے واقعات اس امر کی نشاندہی کرتے ہیں کہ جب کسی ملک میں عوامی سطح پر مزاحمتی جذبہ مضبوط ہو جائے تو وہ جدید ٹیکنالوجی سے لیس افواج کے لیے بھی چیلنج بن سکتا ہے۔
یہ پیش رفت ایک ایسے وقت میں سامنے آئی ہے جب خطے میں کشیدگی مسلسل بڑھ رہی ہے، اور اس نوعیت کے واقعات مستقبل میں جنگ کے روایتی انداز میں تبدیلی کی علامت سمجھے جا رہے ہیں۔
