ریاض: سائبر خطرات سے نمٹنے اور ڈیجیٹل تعاون کو فروغ دینے کے لیے پاکستان اور سعودی عرب کے درمیان ایک اہم مفاہمتی یادداشت پر دستخط کر دیے گئے ہیں، جس سے دونوں برادر ممالک کے مابین سائبر سیکیورٹی کے شعبے میں اسٹریٹجک تعاون کے ایک نئے دور کا آغاز ہو گیا ہے۔

تفصیلات کے مطابق سعودی عرب کے دارالحکومت ریاض میں منعقدہ ایک پروقار تقریب کے دوران سعودی نیشنل سائبر سیکیورٹی اتھارٹی (NCA) اور پاکستان کی وزارتِ انفارمیشن ٹیکنالوجی و ٹیلی کمیونیکیشن کے درمیان معاہدے کو حتمی شکل دی گئی۔ اس تاریخی معاہدے پر پاکستان کی وفاقی وزیر برائے انفارمیشن ٹیکنالوجی شزہ فاطمہ خواجہ اور سعودی عرب کی نیشنل سائبر سیکیورٹی اتھارٹی کے گورنر انجینئر ماجد المزیّد نے دستخط کیے۔ اس موقع پر دونوں رہنماؤں نے اس عزم کا اظہار کیا کہ یہ معاہدہ دونوں ممالک کے اہم مفادات کے تحفظ اور سائبر اسپیس کو محفوظ بنانے میں کلیدی کردار ادا کرے گا۔

معاہدے کے تحت پاکستان اور سعودی عرب سائبر اسپیس کے شعبے میں باہمی تعاون کو فروغ دیں گے جبکہ ابھرتے ہوئے سائبر خطرات سے نمٹنے کے لیے مہارت، معلومات اور جدید ترین تجربات کا تبادلہ بھی کیا جائے گا۔ اس شراکت داری کا مقصد دونوں ممالک کے حساس ڈیجیٹل ڈھانچے کو محفوظ بنانا اور سائبر حملوں کے خلاف دفاعی صلاحیتوں کو مضبوط کرنا ہے۔

دوسری جانب، وفاقی وزیر آئی ٹی شزہ فاطمہ خواجہ نے ریاض میں جاری عالمی ٹیکنالوجی کانفرنس "لیپ 2026" (LEAP 2026) کی سائیڈ لائنز پر ڈیجیٹل کوآپریشن آرگنائزیشن (DCO) کی سیکرٹری جنرل دیمہ الیحیٰ سے بھی ایک اہم ملاقات کی۔ ملاقات کے دوران پاکستان اور ڈی سی او کے مابین ڈیجیٹل شعبے میں تعاون کو مزید وسعت دینے اور مشترکہ منصوبوں کو مضبوط بنانے پر تفصیلی گفتگو ہوئی۔ وفاقی وزیر نے اس بات پر زور دیا کہ پاکستان ڈیجیٹل تبدیلی اور عالمی تعاون کے فروغ کے لیے پرعزم ہے۔