حسبان میڈیا (ویب ڈیسک): وفاقی حکومت نے گزشتہ مالی سال کے ابتدائی 11 ماہ کے دوران بجلی پیدا کرنے والی نجی کمپنیوں، یعنی آئی پی پیز، کو مجموعی طور پر 29 کھرب 35 ارب روپے ادا کیے۔

وزارتِ توانائی کی جانب سے آئی پی پیز کو کی جانے والی ادائیگیوں کی تفصیلات پارلیمنٹ میں پیش کردی گئی ہیں، جن کے مطابق مذکورہ مدت کے دوران بجلی کی خریداری اور پیداواری اخراجات کی مد میں 11 کھرب 68 ارب روپے ادا کیے گئے۔

دستاویز کے مطابق آئی پی پیز کو بجلی پیدا کرنے کی صلاحیت کی ادائیگیوں کی مد میں 11 ماہ کے دوران 15 کھرب 65 ارب روپے دیے گئے۔

یوں گزشتہ مالی سال کے 11 ماہ میں انرجی اور کیپسٹی پیمنٹس کی مد میں آئی پی پیز کو مجموعی طور پر 29 کھرب 33 ارب روپے کی ادائیگی بنتی ہے، تاہم فراہم کردہ تفصیلات میں مجموعی ادائیگی 29 کھرب 35 ارب روپے ظاہر کی گئی ہے۔