کراچی: ائیرپورٹ ہیلتھ ڈپارٹمنٹ نے بین الاقوامی پروازوں کے مسافروں اور بالخصوص عمرہ زائرین کے لیے نئی سفری گائیڈ لائنز جاری کرتے ہوئے 14 ستمبر سے نادرا ویکسینیشن سرٹیفکیٹ کے بغیر بیرونِ ملک سفر پر مکمل پابندی عائد کرنے کا اعلان کر دیا ہے۔ محکمے کی جانب سے جاری کردہ آفیشل اعلامیے کے مطابق، تمام ائیرلائنز کو پابند کیا گیا ہے کہ وہ بورڈنگ پاس جاری کرنے سے قبل مسافروں کے نادرا ویکسین کارڈز کی سو فیصد تصدیق کو یقینی بنائیں۔

جناح انٹرنیشنل ائیرپورٹ کراچی کے ذرائع کے مطابق، عمرہ کی سعادت کے لیے جانے والے زائرین کو روانگی سے قبل اپنا نادرا ویکسین کارڈ لازمی حاصل کرنے کی ہدایت کی گئی ہے۔ اعلامیے میں واضح کیا گیا ہے کہ بین الاقوامی مسافروں کی ویکسینیشن کے لیے فیڈرل گورنمنٹ سول ڈسپنسری کو واحد مجاز مرکز مقرر کیا گیا ہے۔

ائیرپورٹ انتظامیہ نے مسافروں کی سہولت اور پروازوں کے شیڈول کو برقرار رکھنے کے لیے خصوصی ہدایات جاری کی ہیں، جن کے تحت ائیرپورٹ پر ہی ویکسین لگوانے کے خواہش مند مسافروں کو پرواز کے مقررہ وقت سے کم از کم 6 گھنٹے قبل ائیرپورٹ پہنچنا ہوگا۔ انٹرنیشنل ڈپارچر لاؤنج پر مسافروں کی فوری ویکسینیشن کے ساتھ ساتھ نادرا کے پورٹل پر آن لائن رجسٹریشن کی سہولت بھی فراہم کی جائے گی تاکہ مسافروں کو سفری دستاویزات کے حصول میں کوئی دشواری پیش نہ آئے۔