ہنگو میں سیکیورٹی اہلکار کا اغوا اور لرزہ خیز قتل، اورکزئی ایلیٹ فورس کے جوان کی لاش سماری سے برآمد

ہنگو (نمائندہ خصوصی، حسبان میڈیا): خیبرپختونخوا کے ضلع ہنگو میں بدامنی کی ایک اور افسوسناک واردات سامنے آئی ہے جہاں علاقہ سماری سے لاپتہ ہونے والے اورکزئی ایلیٹ فورس کے ایک اہلکار کو نامعلوم شرپسندوں نے اغوا کرنے کے بعد انتہائی بے دردی سے شہید کر دیا ہے۔ پولیس حکام کے مطابق مذکورہ اہلکار گزشتہ کچھ وقت سے لاپتہ تھا جس کی تلاش کے لیے سرچ آپریشن جاری تھا۔

ہنگو پولیس کی جانب سے جاری کردہ ابتدائی بیان کے مطابق، سیکیورٹی اہلکار کو نامعلوم مسلح افراد نے نامعلوم مقام پر منتقل کیا اور بعد ازاں فائرنگ کر کے شہید کر دیا۔ واقعے کی اطلاع ملتے ہی پولیس کی بھاری نفری اور امدادی ٹیمیں موقع پر پہنچ گئیں اور شہید اہلکار کی مسخ شدہ لاش کو تحویل میں لے کر فوری طور پر ڈسٹرکٹ ہیڈ کوارٹر (DHQ) ہسپتال ہنگو منتقل کر دیا ہے، جہاں ضروری قانونی کارروائی اور پوسٹ مارٹم کے مراحل پورے کیے جا رہے ہیں۔

واقعے کے فوراً بعد پولیس اور قانون نافذ کرنے والے دیگر اداروں نے پورے علاقے کو گھیرے میں لے کر ناکہ بندی سخت کر دی ہے۔ پولیس ذرائع کا کہنا ہے کہ ملوث عناصر کی گرفتاری کے لیے سماری اور اس کے گردونواح کے پہاڑی علاقوں میں ایک جامع سرچ آپریشن شروع کر دیا گیا ہے۔ قانون نافذ کرنے والے اداروں نے عزم ظاہر کیا ہے کہ قومی سلامتی اور امن و امان کے ضامن جوانوں کو نشانہ بنانے والے سفاک قاتلوں کو بہت جلد کیفرِ کردار تک پہنچایا جائے گا۔