وزیراعظم شہباز شریف کی زیرِ صدارت پرائم منسٹر فیول ریلیف پروگرام پر اہم اجلاس؛ 28.6 ارب روپے کی ادائیگیاں مکمل، پٹرول پمپس کو سخت وارننگ جاری

اسلام آباد (حسبان نیوز ڈیسک): وزیراعظم محمد شہباز شریف نے پرائم منسٹر فیول ریلیف پروگرام میں اب تک کی پیشرفت اور شفافیت پر گہرے اطمینان کا اظہار کرتے ہوئے متعلقہ حکام کو سخت ہدایات جاری کی ہیں کہ جو پٹرول پمپس اسکیم کے تحت رجسٹرڈ مستحقین کو سہولت فراہم نہیں کر رہے، ان کے لائسنس فوری طور پر منسوخ کیے جائیں۔ وزیراعظم ہاؤس کے میڈیا ونگ سے جاری کردہ بیان کے مطابق، وزیراعظم کی زیرِ صدارت فیول ریلیف اسکیم کے حوالے سے ایک اعلیٰ سطح کا اہم جائزہ اجلاس منعقد ہوا، جس میں وفاقی وزیر برائے انفارمیشن ٹیکنالوجی شزا فاطمہ، وفاقی سیکریٹری آئی ٹی کامران شراف ہاشم خان اور ان کی ٹیم نے شرکت کی۔

اجلاس کے دوران وزیراعظم کو تفصیلی بریفنگ دیتے ہوئے بتایا گیا کہ پٹرولیم سبسڈی اسکیم کے تحت اب تک 1 کروڑ 55 لاکھ 19 ہزار 282 شہری کامیابی سے رجسٹرڈ ہو چکے ہیں۔ ان رجسٹرڈ صارفین میں 1 کروڑ 50 لاکھ 60 ہزار موٹر سائیکل مالکان اور 4 لاکھ 49 ہزار 800 سی سی تک کی گاڑیوں کے مالکان شامل ہیں۔ بریفنگ میں مزید انکشاف کیا گیا کہ 4 نومبر 2026 تک اس فیول سبسڈی اسکیم کے تحت 28.6 ارب روپے کی رقم براہِ راست مستحقین کو منتقل کی جا چکی ہے۔ اس ڈیجیٹل سسٹم کے ذریعے اب تک 6 کروڑ 31 لاکھ 53 ہزار 885 ٹوکن جاری ہوئے، جن میں سے 5 کروڑ 94 لاکھ 45 ہزار 347 ٹوکنز کامیابی سے استعمال کیے جا چکے ہیں۔

وزیراعظم شہباز شریف نے رجسٹریشن اور سبسڈی کے حصول کے طریقہ کار کو مزید آسان بنانے کی تعریف کرتے ہوئے کہا کہ الحمدللہ، شفاف اور ٹیکنالوجی پر مبنی یہ اسکیم مستقبل میں عوامی فلاح و بہبود کے لیے ایک 'گیم چینجر' ثابت ہوگی۔ انہوں نے اسکیم کی سخت مانیٹرنگ اور کارکردگی کا جائزہ لینے کے لیے ایک خصوصی مانیٹرنگ اور کارگزار ڈیش بورڈ ترتیب دینے کے لیے وفاقی اور صوبائی آئی ٹی ٹیموں کی کارکردگی کو بھی سراہا۔ مزید برآں، صارفین اور پٹرول پمپ مالکان کی معلومات کی فراہمی اور شکایات کے فوری ازالے کے لیے الگ الگ مخصوص کال سینٹرز بھی قائم کر دیے گئے ہیں تاکہ اس عوامی منصوبے میں کسی بھی قسم کے تعطل یا کرپشن کا سدِباب کیا جا سکے۔