باجوڑ میں سیکیورٹی کی موجودہ صورتحال کے پیش نظر ضلعی انتظامیہ نے اہم فیصلہ کرتے ہوئے 39 تعلیمی اداروں کو تاحکمِ ثانی بند رکھنے کا اعلان کر دیا ہے۔
ڈپٹی کمشنر باجوڑ شاہد علی کے مطابق یہ اقدام طلبہ اور اساتذہ کی حفاظت کو مدنظر رکھتے ہوئے کیا گیا ہے۔ انتظامیہ کا کہنا ہے کہ حالات معمول پر آنے تک مذکورہ اسکولز بند رہیں گے۔
ضلعی حکام کے مطابق بند کیے گئے اسکولز تحصیل ناوگئ، تحصیل واڑہ ماموند اور تحصیل لوی ماموند میں واقع ہیں، جہاں سیکیورٹی صورتحال کو حساس قرار دیا گیا ہے۔
واضح رہے کہ ضلع بھر میں سرمائی تعطیلات کے اختتام کے بعد تعلیمی ادارے کل سے کھل رہے ہیں، تاہم سیکیورٹی خدشات کے باعث ان 39 اسکولز کو بدستور بند رکھا جائے گا۔
انتظامیہ نے والدین اور طلبہ سے اپیل کی ہے کہ وہ سرکاری ہدایات پر عمل کریں اور کسی بھی نئی پیش رفت کے لیے ضلعی انتظامیہ کے اعلانات پر نظر رکھیں ۔