پشاور: چارسدہ واقعے کے بعد سکیورٹی ریڈ الرٹ، علماء کرام اور حساس مقامات کی نگرانی سخت
پشاور : چارسدہ میں پیش آنے والے حالیہ افسوسناک واقعے کے تناظر میں پشاور پولیس نے ضلع بھر میں سکیورٹی کے انتظامات انتہائی سخت کر دیے ہیں۔ سی سی پی او پشاور ڈاکٹر میاں سعید احمد کی خصوصی ہدایات پر پشاور پولیس نے علماء کرام، حساس مساجد اور اہم تنصیبات کی سکیورٹی کا جامع جائزہ لینے کے بعد تمام متعلقہ افسران کو ہائی الرٹ رہنے کا حکم جاری کر دیا ہے۔
تفصیلات کے مطابق، شہر بھر میں امن و امان کی صورتحال کو برقرار رکھنے اور کسی بھی ناخوشگوار واقعے سے بچنے کے لیے سکیورٹی پلان کو مزید فعال بنا دیا گیا ہے۔ سی سی پی او نے واضح کیا ہے کہ علماء کرام اور معزز شخصیات کی حفاظت کو یقینی بنانے کے لیے خصوصی ٹیمیں تشکیل دی گئی ہیں جو حساس مقامات کی مسلسل نگرانی کریں گی۔ پشاور کے داخلی اور خارجی راستوں پر ناکہ بندی کر دی گئی ہے جہاں ہر آنے جانے والی گاڑی اور مشکوک افراد کی کڑی تلاشی لی جا رہی ہے۔
پولیس حکام کا کہنا ہے کہ پشاور کے مختلف حصوں میں 'سنیپ چیکنگ' اور 'سرپرائز ناکہ بندیوں' کا سلسلہ بھی شروع کر دیا گیا ہے تاکہ شرپسند عناصر کے ناپاک عزائم کو ناکام بنایا جا سکے۔ ڈاکٹر میاں سعید احمد نے اپنے بیان میں اعادہ کیا کہ شہریوں، بالخصوص علماء کرام کی جان و مال کا تحفظ پشاور پولیس کی اولین ترجیح ہے اور اس ضمن میں کسی بھی قسم کی غفلت برداشت نہیں کی جائے گی۔
