پشاور (کرائم رپورٹر، حسبان میڈیا)
انسپکٹر جنرل آف پولیس (آئی جی) خیبر پختونخوا ذوالفقار حمید نے صوبے میں امن و امان کی صورتحال کو برقرار رکھنے، جرائم کی روک تھام اور جدید سیکیورٹی چیلنجز سے نمٹنے کے لیے 7 ارب روپے کے خطیر بجٹ سے تیار کردہ سیکیورٹی منصوبوں کا اعلان کیا ہے۔ پشاور میں میڈیا سے گفتگو کرتے ہوئے آئی جی کے پی کا کہنا تھا کہ صوبے میں پولیس فورس کی استعداد کار بڑھانے، دہشت گردی کے خلاف کارروائیوں کو موثر بنانے اور جدید ٹیکنالوجی سے بھرپور فائدہ اٹھانے کے لیے بڑے پیمانے پر اقدامات کیے جا رہے ہیں۔ اس منصوبے کے تحت کاؤنٹر ٹیررازم ڈیپارٹمنٹ (سی ٹی ڈی) کو بھی جدید اسلحہ، بلٹ پروف گاڑیاں اور دیگر ضروری وسائل فراہم کیے جا رہے ہیں۔

آئی جی ذوالفقار حمید نے اہم پیش رفت سے آگاہ کرتے ہوئے بتایا کہ پشاور سیف سٹی منصوبہ مکمل طور پر فعال ہو چکا ہے، جبکہ ڈیرہ اسماعیل خان، بنوں اور لکی مروت میں سیف سٹی منصوبوں پر 90 فیصد سے زائد کام مکمل کر لیا گیا ہے۔ ان منصوبوں کی تکمیل سے شہروں کی فضائی و زمینی نگرانی، جرائم کی روک تھام اور سیکیورٹی صورتحال پر نظر رکھنے کی صلاحیت میں بے پناہ اضافہ ہوگا۔ اس کے ساتھ ہی، صوبے کی انتہائی حساس 40 تحصیلوں میں ڈرون جیمرز کی تنصیب کے لیے منصوبہ بندی شروع کر دی گئی ہے تاکہ حساس علاقوں میں دشمن قوتوں کی جانب سے ڈرون کے ممکنہ استعمال اور خطرات کو روکا جا سکے۔

تنخواہوں کے حوالے سے بات کرتے ہوئے آئی جی کا کہنا تھا کہ اگر چاروں صوبوں میں پولیس کی تنخواہوں کا تقابلی جائزہ لیا جائے تو خیبر پختونخوا پولیس تیسرے یا چوتھے نمبر پر آتی ہے، جو کہ فورس کی مالی مشکلات اور خدمات کی نوعیت کو مدنظر رکھتے ہوئے ناکافی ہے۔ انہوں نے بتایا کہ نامساعد حالات کے باوجود جوانوں کے مارٹر اور فرنٹ لائن پر فرائض کی نوعیت کو دیکھتے ہوئے تنخواہوں میں بہتری کی منظوری دے دی گئی ہے۔ کے پی پولیس دہشت گردی کے خلاف جنگ میں فرنٹ لائن پر موجود ہے، اس لیے ان کی فلاح و بہبود، جدید وسائل کی فراہمی اور پیشہ ورانہ صلاحیتوں میں اضافے کو ترجیح دی جا رہی ہے۔